Рөстәм Миңнеханов Чистайның тарихи үзәгендә берничә объектта булды
Татарстан Рәисе Рөстәм Миңнеханов Чистай шәһәренең тарихи үзәгендә берничә объектта булды. Аны Рәис ярдәмчесе Олеся Балтусова, ТР мәдәният министры Ирада Әюпова, ТР төзелеш, архитектура һәм ТКХ министры Марат Айзатуллин, ТР Мәдәни мирас объектларын саклау комитеты рәисе Иван Гущин, ТР Туризм буенча дәүләт комитеты рәисе Сергей Иванов, Чистай районы башлыгы Дмитрий Иванов озата йөрде.
Мәсәлән, Рөстәм Миңнеханов яңа пристань төзелешенең барышы белән танышты. Бүгенге көндә пассажирлар павильоны бинасы әзер, янәшәдәге территорияне төзекләндерү һәм причал стенасын кору эшләре дәвам итә. Яңа объект шәһәрнең туристлар җәлеп итүчәнлегенә уңай йогынты ясар дип көтелә. Проектны быел тәмамлау планлаштырыла.
Рөстәм Миңнеханов навигация чоры тәмамланганнан соң павильонны яшьләр белән эшләү өчен кулланырга тәкъдим итте: биредә яшүсмерләр клубы урнаштырырга, балалар өчен төрле чаралар үткәрергә. "Җәй көне монда теплоходларда килүче кунакларны каршы алырга мөмкин, ә кыш көне бина буш тормасын өчен яшьләр өчен активлык оештырырга мөмкин. Бик яхшы урын, биредә барлык шартлар да тудырылган", - дип ассызыклады Татарстан Рәисе. Ул шулай ук спорт һәм балалар уеннары зоналарын җиһазландырырга кушты. Киләсе объект Маркин урамындагы булачак кунак йорты мәйданчыгы булды. Проект 2024 елның 21 маенда тарихи торак пунктларда шәһәр төзелеше эшчәнлеге мәсьәләләре буенча ведомствоара комиссия утырышында тәкъдим ителгән. Карау нәтиҗәләре буенча кунакханәнең архитектура хәл ителешен эшләп бетерергә тәкъдим ителде. Бүген Рөстәм Миңнехановка фасадны бизәүнең берничә яңа вариантын тәкъдим иттеләр, аларның берсе нигез итеп алынды. Аннары республика Рәисе төбәк (республика) әһәмиятендәге мәдәни мирас объекты булган Александровский кич куну йортын карады. Йорт 1896 елда төзелгән. Йортлары булмаганнар өчен бушлай төн кунарга билгеләнгән, шәһәр акчасына тотылган. 1897 елда Чистай шәһәр Думасы үтенече буенча кич куну йортына император Александр III исеме бирелә. 1910 елда бина үзгәртеп корыла һәм һөнәрчелек училищесы тулай торагы итеп, ә совет чорында торак итеп яраклаштырыла. Чистай шәһәренең тарихи торак пунктын тотрыклы үстерү концепциясе нигезендә бинаны туристларны мәгълүмати озата йөрү үзәге итеп кулланырга киңәш ителә. Шулай ук Рөстәм Миңнеханов янәшәдә туристлар автобуслары өчен парковка оештырырга тәкъдим итте. Сәүдәгәр Челышев биналары комплексында ИТ өлкәсендә яшь белгечләр әзерләү үзәге һәм җирле һөнәрчеләр өчен остаханәләр ачу планлаштырыла. Бүгенге көндә биналар буш тора. Рөстәм Миңнеханов биналарны тикшерү һәм алга таба ремонтлау буенча карар кабул итәргә кушты. Карл Маркс урамында Татарстан Рәисенә буш җир кишәрлекләре күрсәттеләр - монда тарихи мохитне торгызу эшен оештырырга мөмкин. Рөстәм Миңнеханов инициативаны хуплады һәм инвесторлар эзли башларга чакырды. Аннары ул җирле (муниципаль) әһәмияттәге мәдәни мирас объектында булды. 1847 елда сәүдәгәр Мешкичевның торак йорты буларак төзелгән бинаны 10 елдан соң классицизм стилендә шәһәр һәм уезд гавами урыннарын урнаштыру өчен сатып алалар. 1887 елда Казан губерна архитекторы Остовский проекты буенча йорт почта, телеграф, казначылык һәм полиция өчен үзгәртеп корылган һәм җайлаштырылган. 1901 елда ишегалдында Чистай өяз полиция идарәсе каршында яңа арестант биналары барлыкка килә. Хәзерге вакытта бинага Чистайның архитектура һәм шәһәр төзелеше хезмәтләре, конторалар һәм торак фатирлар урнашкан. Объектны саклап калу максатыннан район җитәкчелеге түбә ремонтлау һәм баскычның беренче катындагы япмаларны ныгыту буенча эшләр башкарган. Бина буенча тикшерү үткәрергә һәм проектны актуальләштерергә кушылды бирелгән. Шулай ук визиты кысаларында Рөстәм Миңнеханов шәһәрнең туристлар белән эшләү планнары белән танышты. Бүген Чистайда җирле җитештерүләргә бару белән сәнәгать туризмы форматы гамәлгә ашырыла, глэмпинг инфраструктурасы актив үсеш ала, шулай ук «Kama Fest» музыкаль фестивален үткәрү планлаштырыла. Рөстәм Миңнеханов үз чиратында шәһәр җитәкчелеген мәдәният һәм тарих һәйкәлләренә сак карарга чакырды. "Чистай - бай тарихлы уникаль шәһәр. Монда бик күп үзенчәлекле архитектура сакланып калган. Сезнең зур туризм потенциалыгыз бар. Аны дөрес тормышка ашырырга кирәк. Шуңа күрә объектларны реконструкцияләүгә һәм тарихи үзәк территориясендә яңа төзелешкә игътибар белән карарга кирәк», - дип ассызыклады Татарстан Рәисе.