Чистай районы башлыгы җирле эшмәкәрләр белән очрашу үткәрде.
Очрашуда шәһәрнең икътисады һәм архитектурасы белән бәйле мәсьәләләр турында фикер алыштылар.
«Чистай» мәдәни үзәгенең бер залында Чистай районы башлыгы Дмитрий Иванов шәһәр эшмәкәрләре белән очрашты.
Дмитрий Алексеевич җыелганнарны җылы сәламләде. Чәй эчкәндә алар шәһәрнең икътисады һәм архитектурасы, гуманитар ярдәм күрсәтү һәм сәнәгать диспансеризациясе белән бәйле мәсьәләләр буенча фикер алыштылар.
Башта шәһәрнең икътисади үсеше темасына кагылдылар. Быел беренче яртыеллыкта Чистай районы социаль-икътисадый үсеш рейтингында 15 нче урынны алды.
Хәзерге вакытта предприятие һәм оешмаларда 16 900 кеше эшли. Тулай территориаль продукт быел 45 млрд сумнан артык тәшкил иткән. Чистай предприятиеләре 32 млрд сумлык үзләре җитештергән товар төяп озаткан.
Районның җир һәм милек мөнәсәбәтләре палатасы җитәкчесе Марина Исхакова шәһәребездә урнашкан борынгы утарларның язмышы турында сөйләде.
- Без борынгы биналарны шартлы сумга сатуга куябыз. Димәк, объект милке инвесторларга нибары бер сумга күчә. Реставрация чорында җир кишәрлекләре өчен аренда түләве дә 1 сум тәшкил итәчәк, - дип билгеләп үтте Марина Юрьевна. - Барлык мәдәни мирас объектларына эскиз проектлары әзерләнде инде. Әгәр сез бинаны сатып алырга карар итсәгез, без эш күләме нинди булырга тиешлеген, реставрациядән соң объектның нинди булырга тиешлеген җентекләп сөйләрбез.
«Чистай» индустриаль паркын үстерү бүлеге җитәкчесе Владимир Субботин «мәдәни Фонд» акчаларының гуманитар ярдәмгә тотылуы турында сөйләде.
- Без үзебезнең сугышчыларга һәм Лисичанск халкына даими рәвештә гуманитар йөк җибәрәбез. Азык-төлек, медикаментлар, инструментлар, автомобильләр өчен запас частьләр, шәхси гигиена чаралары, кием-салым һәм башка бик күп әйберләр илтәбез. Агымдагы елның августында Курск өлкәсендә яшәүчеләргә гуманитар ярдәм күрсәтү өчен 1,8 млн сум акча җыелган. Без шулай ук хәрбиләрнең гаиләләренә дә ярдәм итәбез, - диде Владимир Николаевич.
Чистай үзәк район хастаханәсе баш табибы Илдар Хәнифов сәнәгать диспансеризациясе узуның мөһимлеген искә төшерде.
- Тагын бер кат шуны искәртәсем килә: предприятие һәм оешма хезмәткәрләренә даими рәвештә диспансеризация узарга кирәк. Ул бөтенләй бушлай һәм кешенең гомерен саклап кала ала. Диспансеризация узгач, сез авыруны иртә стадиядә вакытында ачыклый аласыз һәм дәвалау курсын уза аласыз, — дип билгеләде баш табиб.
Сүзен йомгаклап, Дмитрий Иванов хәбәр иткәнчә, күптән түгел Мебель фабрикасы микрорайонында коммерцияле торак төзү планы расланган. Гипермаркет артында 4 күпфатирлы йорт төзеләчәк.