РФ Дәүләт Думасы депутаты Олег Морозов Чистай студентларына исемле стипендияләр тапшырды.
Укудагы уңышлары һәм фәндәге казанышлары өчен КНИТУ-КАИның «Восток " филиалының 4 студенты исемле стипендиягә лаек булды
РФ Дәүләт Думасы депутаты Олег Морозов студентлар белән аралашу һәм алдынгыларга исемле стипендияләр тапшыру өчен КНИТУ-КАИның «Восток» Чистай филиалында булды. Уку йортына ул муниципаль район башлыгы Дмитрий Иванов белән килде.
Аларны КНИТУ-КАИның административ тәэмин итү һәм үсеш буенча проректоры Эльвир Якупов һәм филиал директоры Илшат Мөхәммәтҗанов каршы алды.
Башта Олег Викторович студентлар һәм укытучылар белән илдәге хәлләр турында фикерләре һәм карашлары белән уртаклашты, туган иле белән горурлануы турында сөйләде.
Аралашу барышында теләге булган һәркем кунакларга үзләрен борчыган сорауны бирә алды.
Очрашуның кульминациясе исемле стипендияләр тапшыру булды. Быел Укудагы зур уңышлары һәм фәндәге казанышлары өчен РФ Дәүләт Думасы депутаты Олег Морозовның исемле стипендиясенә 4 студент лаек булды. Болар - «приборлар төзү» юнәлешенең 4 курс студентлары Анастасия Захарова һәм Андрей Харин, «приборлар төзү» юнәлешенең 3 курс студенты Светлана Тихонова, «Информатика һәм исәпләү техникасы» юнәлешенең 3 курс студенты Раил Миңнебетдинов.
Исегезгә төшерәбез, исемле стипендияләр 2020 елда расланган һәм семестрга бер мәртәбә иҗтимагый, уку һәм фәнни эшчәнлектә иң югары казанышларга ирешкән студентларга бирелә.