Чистайда хокук бозуларны профилактикалау буенча ведомствоара комиссия утырышы узды
Утырышны Башкарма комитет җитәкчесе Эдуард Хәсәнов үткәрде.
Хакимият бинасында ведомствоара комиссия утырышы булды, анда җирле халык арасында хокук бозуларның актуаль мәсьәләләре турында фикер алыштылар. Утырышны Башкарма комитет җитәкчесе Эдуард Хәсәнов үткәрде.
Наркотикларның законсыз әйләнешенә каршы тору өлкәсендә хокук саклау органнары эшчәнлеге турында Россия Эчке эшләр министрлыгының Чистай районы буенча бүлегенең наркотиклар әйләнешен контрольдә тоту бүлеге начальнигы Руслан Әгъзамов сөйләде.
— Быел законсыз әйләнештән ике килограммнан артык наркотик матдә алынды. Барлыгы 40 административ хокук бозу ачыкланган, ул елны аларның саны 57 булган. Шунысы игътибарга лаек, кагыйдә бозулар нигездә июль ахырыннан октябрьгә кадәр булган, — дип билгеләп үтте Руслан Рамильевич.
Безнең шәһәрдә тагын бер җитди проблема мәктәп укучыларының һәм студентларның үз-үзләрен тотышы белән бәйле.
- Яшьләрнең күбесе электрон сигаретка бәйлелектән интегә. Өстәвенә, алар вейпларны бөтенләй яшь вакытта парлый башлый, ә аннары инде «моннан башка яши алмыйлар». Әгәр дә алар үзләренең никотин дозасын алмасалар, агрессив булалар, аларда депрессия барлыкка килә һәм эшкә сәләтлелек кими, — дип билгеләп үтә Чистай үзәк район хастаханәсе табибы наркологы Анна Байдакова. - Без укучылар арасында даими рәвештә тест үткәрәбез һәм аларга тәмәке тартуның зыяны турында видеороликлар күрсәтәбез.
Россия Эчке эшләр министрлыгының Чистай районы буенча бүлегенең ОПДН УУПЫ начальнигы урынбасары Ландыш Әхмәрова хәбәр иткәнчә, районда социаль челтәрләрнең берсендә куркыныч төркемнәрдә торучы студентлар һәм мәктәп укучылары ачыкланган.
- Быел Чистай районының балигъ булмаганнар эшләре буенча инспекторлары һәм участок полицейскийлары балигъ булмаганнар җыела торган урыннарга төнге рейдлар үткәрделәр. Тикшерү нәтиҗәсендә 19 балигъ булмаган бала алкоголь кулланган яки җәмәгать урыннарында исерек хәлдә булган. Бу уңайдан ике административ беркетмә төзелде, - дип өстәде Ландыш Рафаэль кызы.
Шәһәр башлыгы урынбасары Михаил Ксенофонтов тәртип саклау буенча җәмәгать пунктлары, хокук саклау юнәлешендәге муниципаль хезмәткәрләр эшчәнлегенә һәм гражданнарның җәмәгать тәртибен тәэмин итүдә катнашуына бәйле эш нәтиҗәләре һәм проблемалар турында сөйләде.
Нотык белән шулай ук Чистай районы советының иҗтимагый оешмалар, массакүләм мәгълүмат чаралары һәм милләтара мөнәсәбәтләр бүлеге җитәкчесе Илфат Мәгыйзов чыгыш ясады. Ул халык арасында экстремизмга каршы пропаганда чараларын гамәлгә ашыру буенча җирле массакүләм мәгълүмат чаралары эше турында сөйләде.