Чистай депутатлары шәһәр бюджетына үзгәрешләр кертте
Бюджет кире кайтарылмый торган күчерүләр һәм чыгымнарны үз акчаларыбызның калдыгы исәбенә арттыру аркасында үзгәртелде.
Муниципалитетта Чистай шәһәр Советының чираттан тыш утырышы узды. Аны муниципаль район башлыгы Дмитрий Иванов үткәрде.
Көн тәртибенә биш сорау чыгарылды. Алар шәһәр бюджетына үзгәрешләр кертүгә, милекне хосусыйлаштыруның фаразлау планына, җирдән файдалану һәм төзелеш кагыйдәләренә һәм башкаларга кагылган.
2022-2024 елларның планлаштырылган чорына шәһәр бюджетына үзгәрешләр кертү турындагы доклад белән финанс-бюджет палатасы җитәкчесе Наталья Карманова чыгыш ясады.
- Шәһәр бюджеты түләүсез күчерүләр, ягъни республика бюджетыннан кергән акчалар исәбенә үзгәрә. Үзгәрешләр 30 миллион 310 мең сум күләмендә булган. Акча индустриаль паркны карап тотуга, мәдәният учреждениеләренең хезмәт хакы фондына бирелде. Моннан тыш, узган ел акча авария хәлендәге йортларны җимерү өчен кайтарылды, шулай ук һөнәри салым буенча да акча керде, алар төзекләндерүгә җибәрелде, - дип сөйләде Наталья Анфиногентовна.
Бюджет үзгәрешләренең икенче блогы үз акчаларының калдыгы хисабына чыгымнарны арттыруга кагылды.
- Чыгымнарның артуы зур - 63 миллион 182 мең сумга. Алардан артуның төп суммасы - 50 миллион сум, алар узган елгы грант буенча кергән. Бюджет законнары буенча әлеге акчалар агымдагы ел бюджетына кертелә һәм грант куйган максатларга, ягъни төзекләндерүгә юнәлтелә. Моннан тыш, калган акчалар хисабына Җиңү һәм Сабантуй көнен бәйрәм итүгә чыгымнар түләнгән. Чистай районы башлыгының резерв фонды хисабына беренче һәм икенче кварталларда 305 мең сум шәһәрнең 19 гражданына ярдәм итүгә юнәлдерелгән. Чыгымнарның киләсе блогы бюджет ассигнованиеләрен күчерү белән бәйле. Депутат комиссиясендә без чыгымнарның һәр суммасын карадык. Бу карарны раславыгызны сорыйм, - дип мөрәҗәгать итте җыелучыларга Наталья Карманова.
Җир һәм милек мөнәсәбәтләре палатасы җитәкчесе Марина Исхакова «2022 елга Читополь шәһәре милкендәге милекне хосусыйлаштыруның фараз планы турында» карарына үзгәрешләр һәм өстәмәләр кертү хакында сөйләде.
- Без мәдәни мирас объектларын һәм шәһәр барлыкка китерә торган тарихи-кыйммәтле объектларны хосусыйлаштыру буенча зур эш башкарабыз. ызанлау, объектлар урнашкан җир кишәрлекләрен кадастр исәбенә кую һәм аларны туры китерү эшләре башкарылды. Бүгенге көнгә барысын да фаразлау планына кертү өчен әзерләдек, - дип билгеләде Марина Юрьевна.
Ул Чистай шәһәре вәкаләтләрен муниципаль контроль буенча тапшыру турында мәгълүмат бирде.
- Җирле үзидарә органнарына җирлекләр территориясендә элек исәпкә алынган күчемсез мөлкәт объектларының хокук ияләрен ачыклау һәм күчемсез мөлкәтнең бердәм дәүләт реестрына кертү өчен күчемсез мөлкәт объектларының хокукка ия булучылары турында белешмәләр җибәрү буенча чаралар күрү һәм үткәрү вәкаләтләрен өстәделәр. Чистай шәһәрендә мондый эшләр башкарырга вәкаләтле орган билгеләнмәгән. Әлеге вәкаләтләрне шәһәрдән районга тапшырырга тәкъдим итәбез, моның белән җир һәм милек мөнәсәбәтләре палатасы шөгыльләнсен өчен, - дип тәкъдим итте Марина Исхакова.
Муниципаль хезмәт Вазыйфаларын биләүне дәгъвалаучы гражданнар, шулай ук муниципаль хезмәткәрләр тарафыннан керемнәр, мөлкәт һәм мөлкәти характердагы йөкләмәләр турында белешмәләр тапшыру хакындагы нигезләмәне раслау турында Чистай шәһәре башлыгы урынбасары Михаил Ксенофонтов чыгыш ясады.
Архитектура бүлеге башлыгы Андрей Шумилов шәһәрдән файдалану һәм төзелеш кагыйдәләренә үзгәрешләр кертү турында хәбәр итте.
- Бездә елга портын реконструкцияләү башлана. Проектны җирдән файдалану һәм төзелеш кагыйдәләренә туры китерү өчен шәһәр төзелешен зоналаштыру картасына үзгәрешләр кертергә кирәк, - дип мөрәҗәгать итте депутатларга Андрей Александрович. Депутатлар чыгарылган тәкъдимнәрне хуплады һәм барлык мәсьәләләр буенча бертавыштан кабул иттеләр.