Чистай шәһәр Советының даими депутат комиссияләре составына үзгәрешләр кертелде.
Татарстан Республикасы Чистай шәһәр Советының ундүртенче утырышы узды.
Көн тәртибенә сигез мәсьәлә чыгарылган иде. Алар шәһәр бюджеты үтәлешенә, элек кабул ителгән карарларга үзгәрешләр кертүгә кагылышлы иде.
Утырыш башланыр алдыннан Дмитрий Иванов депутат Рафис Мәхмүтовка таныклык тапшырды. Күптән түгел ул Тукай районының 12 нче номерлы бер мандатлы сайлау округы буенча Чистай шәһәр Советы депутаты итеп сайланды.
2021 елда шәһәр бюджеты үтәлеше турындагы доклад белән финанс-бюджет палатасы җитәкчесе Наталья Карманова чыгыш ясады.
- Керемнәр шәһәр счетларына 262,6 млн. сум күләмендә керде, чыгымнар 219, 1 млн.сум күләмендә башкарылды. Керемнәрнең чыгымнардан артуы 43,5 миллион сум тәшкил иткән. Керемнәрнең гомуми күләменнән 175,4 миллион, ягъни 66,8 проценты үз чыганаклардан кергән. Физик затлар кеременә салым элеккечә төп керем чыганагы булып кала бирә. Планны арттырып үтәүнең төп сәбәпләре-узган еллардагы бурычларны түләү, дивидендлар түләүләренең артуы, декабрь аенда хезмәт хакын түләү срокларын үзгәртү. Милек салымнары җыемнары да әһәмиятле булып тора, - дип билгеләп үтте Наталья Анфиногентовна.
Ул шулай ук республика һәм федераль бюджетлардан түләүсез күчерелгән акчалар турында да сөйләде.
- Башка дәрәҗәдәге бюджеттан 87,2 миллион сум акча кире кайтарылмый. «Иң яхшы муниципаль практика» Бөтенроссия конкурсында җиңүче шәһәргә дотация бирү зур роль уйнады. Моннан тыш, «май указлары» н гамәлгә ашыруга акча, бюджет тәэмин ителешен тигезләүгә дотацияләр бирелде, – диде докладчы.
Бу мәсьәлә буенча өстәмә доклад белән контроль-хисап палатасы рәисе Ольга Гришина чыгыш ясады. Докладларны тыңлап, депутатлар шәһәр бюджетының үтәлешен расладылар.
Шулай ук утырыш барышында депутатлар элегрәк кабул ителгән карарларга үзгәрешләр керттеләр. Аерым алганда, бюджет процессы турындагы Нигезләмә, «Чистай шәһәре» муниципаль берәмлеге Уставы, гражданнар җыенын әзерләү һәм үткәрү тәртибе турындагы Нигезләмә һәм башкалар бар.
Яңа депутат Рафис Мәхмүтовның сайлануы белән бәйле рәвештә, даими депутат комиссияләре составында үзгәрешләр булды. Ул законлылык, хокук тәртибе, депутат эшчәнлеге мәсьәләләре буенча комиссия составына кертелде.