Чистайлылар Кама яр буен төзекләндерү буенча үз идеяләрен һәм тәкъдимнәрен әйттеләр
«Чистай» мәдәният үзәгендә Кама яр буен төзекләндерү концепциясе буенча җәмәгать тыңлаулары узды.
Залда шәһәр, төрле яшьтәге, социаль статус, һөнәр һәм эшчәнлек кешеләре җыелган иде, алар үз идеяләре һәм тәкъдимнәре белән уртаклашырга, яр буе территориясен төзекләндерүгә үз карашларын сөйләргә әзер иделәр.
Проект белән Алмаз Вәлиуллин җитәкчелегендә «Диалог/Урбан планинг» архитектура бюросы шөгыльләнә. Архитекторлар башта үзләренең инде тормышка ашырылган проектлары турында сөйләделәр, шәһәрлеләргә проектлаштыруның әлеге этабында нинди катнашу кирәклеге турында аңлаттылар.
Яр буе урамының әзер проекты федераль грант конкурсында тәкъдим ителәчәк. Җиңү яулаган очракта, Россия Федерациясе проектны тормышка ашыру өчен 100 миллион сумга кадәр акча бүлеп бирә ала.
– Безгә максималь файда алу, халыкны – бу территориянең булачак кулланучыларын җәлеп итү мөһим. Без, белгечләр, сезнең бу катлаулы, әмма бу проектны оту өчен бик кызыклы эштә ярдәм итүегезне сорыйбыз, - диде проектта катнашучыларга мөрәҗәгать итеп проект җитәкчесе Алмаз Вәлиуллин.
Шәһәрлеләр үз фикерләрен тагын да конструктив белдерү өчен, катнашучыларга башта командаларда төзекләндерү буенча идеяләр һәм тәкъдимнәр турында фикер алышырга, аннары аларны гомумиләштереп, башка катнашучылар алдында белдерергә тәкъдим иттеләр.
Барлык катнашучылар да диярлек төзекләндерелгән пляж булмау уңаеннан канәгатьсезлек белдерделәр. Күп кенә шәһәрлеләр су транспортыннан киртәләп алынган пирс ясарга, байдаркалар, катамараннар арендасы оештырырга, пикник өчен зона һәм балалар мәйданчыгы ясарга сорадылар.
Оештыручылар билгеләп үткәнчә, бу ачык тыңлаулар соңгысы булмаячак. Киләчәктә чистайлыларны архитекторлар белән тагын ике очрашу көтә.