Атналык планеркада районда юл хәрәкәте иминлегенә игътибар иттеләр
Атналык мәгълүмат белән оператив хәл турында Россия Эчке эшләр министрлыгының Чистай районы бүлеге начальнигы Олег Денисов чыгыш ясады.
Узган атнада Чистай муниципаль районында 22 юл-транспорт һәлакәте теркәлгән, аларның 17се шәһәр чикләрендә булган. Авария нәтиҗәсендә 2 кеше тән җәрәхәтләре алган, 1 кеше һәлак булган.
"Чыннан да, узган 2 атнада безнең районда 50гә якын юл-транспорт һәлакәте булды. Әлеге аварияләр нәтиҗәсендә 5 кеше һәлак булган. Юлларда сак булыгыз!" - Чистай муниципаль районы Башкарма комитеты җитәкчесе Эдуард Хәсәнов катнашучыларга мөрәҗәгать итте.
Узган атнада барлыгы 369 хокук бозучы административ җаваплылыкка тартылган, шуларның 320се-юл хәрәкәте кагыйдәләрен бозган өчен, шул исәптән транспорт чарасын исерек килеш идарә иткән 5 автомобильче.