Рөстәм Миңнеханов яңа проектларны гамәлгә ашыру барышы белән танышты

Аны ТР авыл хуҗалыгы министры Марат Әхмәтов, Татарстан Республикасы Президенты Аппараты җитәкчесе урынбасары Илнур Гарипов, РФ Федераль Җыенының Дәүләт Думасы депутаты Айрат Хәйруллин, ТР Чистай муниципаль районы башлыгы Дмитрий Иванов һәм башкалар озата йөрделәр.

 

Иң элек делегация «Чис­тай» индустриаль паркы мәйданчыгында булды. Биредә авыл җирлекләре башлыклары, муниципаль район предприятиеләре һәм учреждениеләре җитәкчеләре белән очрашу үткәрелде. Кунакларга авыл хуҗалыгы культуралары күргәзмәсе тәкъдим ителде, районда авыл хуҗалыгын үстерү мәсьәләләре тикшерелде һәм урып-җыю кампаниясенә йомгак ясалды.

 

Рөстәм Миңнеханов күпче­лек күрсәткечләр буенча рай­онның яхшы үсүен билгеләп үтте. Ул авыл хуҗалыгын үстерүнең әһәмиятен ассы­­зык­лап, бөртекле культу­ра­лар­ны урып-җыю кампа­ниясенә уңай бәя бирде.

 

Шуннан соң республика җитәкчесе «Татремстрой» пенополиуретан торбалар җитештерү буенча төзелә торган заводны карау максатында «Чистай» индустриаль паркына килде. Биредә «Татремстрой» предприятиесенең «Татарстан Республикасы газификацияләү фонды» ГКУы һәм «Чистай җылылык челтәре предприятиесе» белән хезмәттәшлек турында килешү имзаланды. Тантаналы чарада  ТР икътисад министры Артем Здунов, «Таттеплотруба» производство берләшмәсе җитәкчесе Дмитрий Бобков һәм башка рәсми затлар катнаштылар.

 

Хәзерге вакытта «Чистай» индустриаль паркында берничә резидент теркәлгән, алар төрле эшләнү этабында торган үз проектларын тәкъдим иттеләр. Аерым алганда, «Тат­ремстрой» пенополиуретан торбалар җитештерү буенча завод сафка кертелү-көйләү стадиясендә тора. Җылылык үткәрми торган пенополиуретан торбалар җитештерүдә предприятие тарафыннан ТР территориясендә эшләнә торган полиэтилен чимал кулланыла.