Чистайда «УРАМ» паркыннан мастер-класслар үтте
Анда 70 кеше чамасы катнашты
Чистайда «Татнефть Олимп» стадионы территориясендә «УРАМ» экстрим-паркы командасы оештырган мастер-класслар узды. Чара Татарстанның 12 шәһәре буенча зур тур кысаларында үтте, аларның өчесендә ярышлар да уздырылачак.
«Катнашучыларга тәҗрибәле инструкторлар җитәкчелегендә экстремаль спортның биш юнәлешен үзләштерү мөмкинлеге тудырылды: скейтбординг, паркур, BMX, воркаут һәм самокатта йөрү», — диде «Урам» экстрим-паркының комьюнити-менеджеры Әмир Нуриев.
Оештыручылар сүзләренә караганда, Чистай мастер-классларында 70 ләп яшь кеше катнашты.
«Без балаларның күзләре яңа элемент килеп чыкканда ничек янганын күрәбез. Бу безнең өчен иң яхшы бүләк», — диде Әмир Нуриев.
Аның сүзләренә караганда, мондый мастер-класслар спортны үстерергә генә түгел, сәламәт яшьләр мохитен да булдырырга ярдәм итә.
«Бу инде «Урам» экстрим-паркы командасының Чистайга икенче килүе, һәм без җирле яшьләрнең экстремаль спорт төрләренә кызыксынуын күрүгә шатбыз», — диде Чистай районы яшьләр эшләре бүлеге начальнигы Дамир Хәсәнов.
Ул хезмәттәшлекне алга таба да үстерү өметен белдерде: «Мондый чаралар безнең шәһәр яшьләре өчен мөһим. Киләсе тапкыр тагын да күбрәк катнашучыларны күрергә өметләнәбез».
Катнашучыларның фикерләренә караганда, мастер-класслар яркын тәэсирләр калдырган һәм яңа күнекмәләр алырга гына түгел, фикердәшләр табарга да мөмкинлек биргән.
«Мин беренче тапкыр BMX-та трюклар ясап карадым, — диде мастер-класс катнашучыларының берсе. — Инструкторлар барысын да аңлаешлы итеп аңлаттылар, страховкаладылар. Хәзер үземә велосипед алып, тренировкаларны дәвам итәргә хыялланам!»
Күрүчеләрдә тренерларның күрсәтмә чыгышлары аеруча зур соклану уятты.
«Алар самокатта сальто ясаганда, гаҗәпләнүдән аптырап калдым! — ди 12 яшьлек Даниил. — Хәзер үзем дә һич булмаса гади трюкларга өйрәнергә телим».
Чара катнашучыларга яңа күнекмәләр бүләк иткән, һәм һәр кешедә шатлык, үз көченә ышаныч һәм алга таба хәрәкәт итү теләге калдырган!