Мәктәп каникуллары вакытында Чистай ветераннары һәм полиция хезмәткәрләре балалар белән патриотик эш алып баралар.
Чистай районы буенча Эчке эшләр бүлегенә 1 нче гимназия һәм 1 нче лицей укучылары килде.
Бүлек ветераннары һәм полиция хезмәткәрләре укучыларны дежур часть янындагы фойеда каршы алдылар, әлеге бүлекчәнең эше нидән гыйбарәт икәнлеге турында сөйләделәр. Дежур часть хезмәткәрләре тәүлек буе эшли, дип аңлаттылар. Башка хезмәтләрнең гражданнардан килгән хәбәрләргә ничек оператив җавап бирүләре аларның грамоталы гамәлләренә бәйле.
Чистай милициясе тарихы музеенда музей җитәкчесе Наил Имам улы Гыймаев балаларга Чистайда халык милициясенең барлыкка килү тарихы һәм хәзерге вакытта полиция хезмәткәрләренең эше турында сөйләде. Гимназистлар һәм лицей укучылары бүлек ветераннары тормышыннан бик күп фактлар белделәр һәм үз күзләре белән борынгы фотосурәтләр, күпсанлы документлар һәм хокук саклаучыларның киемнәре вакыт дәвамында ничек үзгәргәнен күрделәр. Музейда Бөек Ватан сугышы елларында милициядә эшләүче хезмәткәрләрнең орденнары, медальләре, Рәхмәт хатлары һәм шәхси әйберләре сакланган.
Лицей укучыларын кинолог эше белән таныштырдылар. Полициянең өлкән лейтенанты Сергей Суринов үзенең кулдашы – «Тайга» кушаматлы эт турында сөйләде, ул полициядә инде 6 ел хезмәт итә һәм шартлаткыч матдәләр һәм корал эзләү буенча эшли.
Малайлар белән очрашуга юл-патруль хезмәте экипажы да килде. Дәүләт автоинспекциясе инспекторы полиция лейтенанты Роман Зәйнетдинов юлда хезмәт итүе турында сөйләде. Балаларга юл хәрәкәте кагыйдәләрен искә төшерде, аларны бозмаска өндәде.
Хокук тәртибе хезмәткәрләре белән очрашу истәлегенә барлык балалар куркынычсызлык кагыйдәләре язылган блокнотлар һәм дәфтәрләр алдылар.
Очрашулар Бөек Ватан сугышында Җиңүнең 80 еллыгына багышланган иде.