Гидротехник корылмаларны һәм кешеләрне урнаштыру пунктларын тикшерү: Чистай районында язгы ташуга ничек әзерләнәләр
Гадәттән тыш хәлләрне кисәтү һәм бетерү, янгын куркынычсызлыгын тәэмин итү буенча район комиссиясе утырышында районның язгы ташу чорына ничек әзерләнүе турында гадәттән тыш хәлләр министрлыгының Чистай районы буенча бүлек начальнигы Радик Рәхмәтуллин сөйләде.
Аның сүзләренә караганда, быел районның су объектларында язгы ташу апрельнең беренче декадасында башланыр дип фаразлана.
- Соңгы 20 елда шәһәрдә һәм районда су басу очраклары теркәлмәде, әмма халыкны вакытлыча урнаштыру пунктларының әзерлеге тикшерелде: Красноярск мәктәбе базасында (40 кеше сыйдырышлы), боз спорт сараенда (50 кеше сыйдырышлы). Барлык документлар эшләнде, персонал белән тренировкалар үткәрелде, — дип билгеләп үтте Радик Рафикович.
Ул хәбәр иткәнчә, язгы ташу нәтиҗәләрен кисәтү һәм бетерү максатларында Чистай районында халыкны вакытлыча урнаштыру пунктлары, әйберләр һәм азык-төлек белән тәэмин итүнең күчмә пунктлары булдырылган, финанс чаралары резервланган.
Аның докладында гидротехник корылмаларның торышына аерым игътибар бирелде. Район территориясендә алар — 18, шуларның 4 се авария хәлендә һәм авария алды хәлендә. 2024 елның октябрендә алар барысы да куркынычсыз дәрәҗәгә кадәр бушатылды.
- ГТСТА суны вакытында төшерүгә һәм суүткәргеч торбаларны чистартуга аерым игътибар бирергә кирәк. Комиссия билгеләячәк бикләрнең ачылу датасын бозмавыгызны үтенәм, - дип мөрәҗәгать итте авыл җирлекләре башлыкларына Гадәттән тыш хәлләр министрлыгының бүлек җитәкчесе.
Утырышка Эуард Хәсәнов йомгак ясады.
— Язгы ташу вакытында имин үтүне тәэмин итү мәсьәләсендә гидротехник корылмаларны кар сулары үтүгә вакытында әзерләргә, аварияләргә юл куймаска, шулай ук юка бозда гражданнарның: балыкчыларның һәм балаларның иминлеген тәэмин итәргә кирәк, — дип йомгаклады комиссия рәисе.