Шәһәр Советының чираттагы 37 нче утырышы булды
Хакимият бинасында шәһәр Советының чираттагы 37 нче утырышы булды. Аны шәһәр башлыгы урынбасары Михаил Ксенофонтов үткәрде. Депутатлар берничә мәсьәлә буенча фикер алыштылар.
2025-2027 елларга шәһәрнең социаль-икътисади үсеше фаразы турында Башкарма комитет җитәкчесенең икътисади мәсьәләләр буенча беренче урынбасары Евгений Никитин хәбәр итте. Үзенең нотыгында ул шәһәр предприятиеләре эше һәм алар җитештергән продукция турында сөйләде.
— 2024 елда Чистай предприятиеләре 39 млрд сумлык продукция төяп озаттылар, - дип билгеләп үтте ул.
Аннары доклад белән финанс-бюджет палатасы җитәкчесе Наталья Карманова чыгыш ясады. Ул 2025 елга һәм 2026-2027 елларның планлы чорына шәһәр бюджеты турында сөйләде.
- Киләсе елда шәһәр бюджетының керемнәре 284 миллион сумнан артып китәр дип көтелә. Бу сумманың 260 миллион сумнан артыгы эчке чыганаклардан, ягъни шәһәр салым түләүчеләреннән алыначак. Тагын 23 миллион сум башка дәрәҗәдәге бюджетлардан түләүсез күчерүләр рәвешендә алыначак, - дип сөйләде Наталья Анфиногентовна.
Ул шулай ук шәһәр буенча уртача хезмәт хакы 62 мең сумнан артык булуын билгеләп үтте.
9 нчы сайлау округы депутаты, законлылык, хокук тәртибе һәм депутат эшчәнлеге мәсьәләләре буенча комиссия рәисе Добга Добронравова шәһәр Уставындагы үзгәрешләр һәм өстәмәләр турында сөйләде.
Шәһәр башлыгы урынбасары Михаил Ксенофонтов ТР Муниципаль берәмлекләре советының 19 нчы съездында катнашуы турында хәбәр итте.
Муниципалитет милкендәге мөлкәтне хосусыйлаштыруның фаразланган планы турында Чистай районының җир һәм мөлкәт мөнәсәбәтләре палатасы җитәкчесе Марина Исхакова сөйләде.
Докладчы шулай ук муниципалитет милкендәге, муниципаль мәдәният оешмаларының хуҗалык карамагында яки оператив идарәсендә булган мөлкәтне арендага бирүне килештерү тәртибе турында сөйләде.
Көн тәртибенең барлык пунктлары буенча депутатлар бертавыштан раслау карарлары кабул иттеләр.