Чистайда рәссам-каллиграф Нәҗип Наккаш күргәзмәсе ачылды
Күргәзмәне ачу тантанасы Ислам үзәгендә узды.
Татарстан Республикасының атказанган сәнгать эшлеклесе, Габдулла Тукай исемендәге Дәүләт премиясе лауреаты Нәҗип Наккашның шәхси күргәзмәсен ачу Чистайның мәдәни тормышында мөһим вакыйга булды.
Гарәп каллиграфиясе күргәзмәсен ачу тантанасында Татарстан Рәссамнар берлеге, шәһәр администрациясе, мөхтәсибәт, балалар сәнгать мәктәбе вәкилләре һәм сәнгать сөючеләр катнашты.
- Шәһәр башлыгы һәм шәхсән үз исемемнән шәһәр халкына сезнең иҗат белән танышырга мөмкинлек биргән өчен рәхмәт белдерәсем килә. Залга кергәч, мин сезнең эшләрегез, уй-ниятләрегез, уйларыгызның тормышка ашуына сокландым, - диде эшләр авторына мөрәҗәгать итеп, Чистай шәһәре башлыгы урынбасары Михаил Ксенофонтов һәм аңа Рәхмәт хаты тапшырды.
- Үз күргәзмәләрем белән гарәп язуының татар халкының мәдәни байлыгы булуын һәм меңләгән еллар дәвамында безнең бабаларыбыз тарафыннан кулланылуын күрсәтәсем килә. Бу шрифтта әдәби һәм фәнни басмалар да язылган һәм бастырылган, дип белдерде Нәҗип Наккаш үзе.
Рәссам-каллиграф эшләре беркемне дә битараф калдырмады. Нәҗип Наккашның барлык әсәрләрендә дә татар халкының милли колориты, үзенчәлекле орнаментлары, бизәкләре күренә. Якты, матур, алар күргәзмәгә килгән һәр кешенең күзләрен җәлеп итә.
Аның эшләре каллиграфия белән оста итеп башкарылган эшләр генә түгел, ә тирән мәгънәле эчтәлекле дә.
– Үз эшемдә мин мәгънәләрне матур форма белән бизәргә тырышам. Форма һәм эчтәлек Гармония тудыра, сәнгать дәрәҗәсен күтәрә, – дип билгеләп үтте рәссам.
Күргәзмәдә шулай ук шәхси гаилә билгеләре, Татарстан Республикасының Беренче Президенты Минтимер Шәймиев һәм Татарстан Республикасының хәзерге Президенты Рөстәм Миңнехановның символикасы кебек уникаль эшләр дә күрсәтелә.
Нәҗип Наккаш эшләре экспозициясе ислам үзәгендә ике ай дәвамында тәкъдим ителәчәк. Теләге булган һәр кеше Нариманов ур., 74 адресы буенча күргәзмәне карый ала.