Татарстан җитәкчелеге бакчачылар көненә Татарстан Республикасы Авыл хуҗалыгы һәм азык-төлек министрлыгы тарафыннан оештырылган ярминкәдә булды
Татарстан Президенты Рөстәм Миңнеханов «Казан» Агросәнәгать паркында бакчачылар көненә багышланган авыл хуҗалыгы ярминкәсендә булды. Республика җитәкчесен ТР Дәүләт Советы Рәисе урынбасары Марат Әхмәтов һәм ТР Премьер-министры урынбасары — авыл хуҗалыгы һәм азык-төлек министры Марат Җәббаров озатып йөрде.
Бәйрәм ачылышында Рөстәм Миңнеханов билгеләп үткәнчә, республикада 380 меңгә якын бакча участогы бар. "Миллионга якын татарстанлы бакчалар рәхәтлегеннән файдалана. 2017 елдан бирле инфраструктур мәсьәләләр буенча бакчачылык ширкәтләренә ярдәм итү программасы эшли, һәм без 2 млрд.сумга якын бурычларны үтәдек», — дип ассызыклады ул.
ТР Президенты республикада киләчәктә дә бакчачылык хәрәкәтенә ярдәм итү программасын гамәлгә ашыру дәвам итәчәк, дип өстәде.
«Бигрәк тә быел бакча участоклары пандемия белән очрашкан вакытта үз әһәмиятен күрсәтте. Минемчә, бакчасы булган кеше һәрвакыт мәшгуль булачак, натураль продукциягә ия булачак, кышкы чорга әзерлекләр башкарачак», — дип билгеләп үтте ул, бакчачыларга яхшы уңыш теләде.
ТР Президенты сәүдә рәтләрен карап чыкты, бакчачылар белән аралашты, сәүдәнең ничек баруы белән кызыксынды.
Казан, Яр Чаллы, Әлмәт, Югары Ослан, Биектау, Яшел Үзән, Лаеш, Түбән Кама, Питрәч, Тукай һәм Чистай районнарының коммерцияле булмаган бакчачылык ширкәтләре җиләк-җимеш, яшелчә, җиләк-җимеш һәм чәчәк үсентеләре, шулай ук башка товарлар тәкъдим итте.Ярминкәгә Татарстан кулланучылар берлегенең район бүлекчәләре дә кушылды. Бәйрәм кунаклары өчен алар шулай ук бакчачылар үстергән алма һәм җиләк-җимешләрдән бушлай пешерелгән компот белән сыйландылар.