Татарстанда 2019 елгы уңышны җыеп алуга әзерлек буенча авыл хуҗалыгы оешмалары арасында конкурс башланды
Республикада АПК предприятиеләре арасында 2019 елгы уңышны җыеп алуга һәм туфракны төп эшкәртүгә әзерлек буенча конкурс башланды. Конкурсның максаты – ашлык җыю комбайннарын, башка авыл хуҗалыгы техникасын һәм ындыр табагы хуҗалыгы җиһазларын урып-җыю кампаниясенә, шулай ук туфракны төп эшкәртү агрегатларын вакытында һәм сыйфатлы әзерләүне тәэмин итү.
"Конкурс 15 июльдән 19 июльгә кадәр барачак, АПК оешмаларының урып – җыю эшләренә һәм туңга сөрү эшләренә әзерлеген республиканың барлык 43 муниципаль районында да бәяләргә кирәк»,-дип сөйләде Татарстан Республикасы Авыл хуҗалыгы һәм азык-төлек министрлыгының АПКны инженер-техник тәэмин итү бүлеге башлыгы Ришат Булатов.
Аның сүзләренә караганда, күрсәтелгән конкурс районнарында министрлык боерыгы белән 15 комиссия төзелгән, аларның составына Татарстан Республикасы Авыл хуҗалыгы һәм азык-төлек министрлыгы, Дәүләт техник күзәтчелеге идарәсе һәм республиканың башка ведомстволары, АПК учреждениеләре һәм оешмалары җитәкчеләре һәм белгечләре кергән.
Конкурс шартлары нигезендә, ашлык җыю комбайннары сезонлы техник хезмәт күрсәтү һәм Дәүләт техник карау узарга тиеш, шул ук вакытта алар барысы да комбайннар парадында тәкъдим ителергә тиеш. Бу парадта комбайнчыларның үзләре, тракторчы-машинист таныклыгы белән алмашуны да кертеп, катнашуы мәҗбүри.
"Һәр комбайн контроль суктыру һәм полог аша үткәрү белән герметиклыкка тикшереләчәк", – дип ассызыклады Ришат Булатов.
Моннан тыш, конкурс барышында комиссия транспорт чараларының, ашлык складларының, киптергечләрнең, ашлык чистарту машиналарының, шулай ук туфракны төп эшкәртү өчен тракторларның һәм коралларның торышын һәм әзерлеген, хезмәтне саклау таләпләрен үтәүне бәяләячәк.
Комбайннар янгын сүндерү чаралары, беренче медицина ярдәме даруханәләре белән комплектланган.