Милләтара һәм конфессиональара мәсьәләләр советының чираттагы утырышы узды
Чистай муниципаль районы башлыгы карамагындагы Милләтара һәм конфессиональара мәсьәләләр советының чираттагы утырышы узды. Аны " Чистай шәһәре"муниципаль берәмлеге башлыгы урынбасары Михаил Ксенофонтов үткәрде.
Кадрлар үзгәрүгә бәйле рәвештә, Совет составы үзгәрешләр кичерде. Шуның белән бәйле рәвештә, советның актуаль составы турында Чистай муниципаль районы Советының иҗтимагый оешмалар, массакүләм мәгълүмат чаралары белән эшләү һәм милләтара мөнәсәбәтләр бүлеге башлыгы Чулпан Хаматова чыгыш ясады.
Шулай ук утырышта дини берләшмәләр вәкилләре чыгыш ясады: Чистай районы мөхтәсибе Мөхәммәд хәзрәт Кыямов Чистай мөхтәсибәтенең 2018 елдагы эш нәтиҗәләре һәм Мәүлид бәйрәмен уздыру турында сөйләде, Иеродиякон Мефодий Копьев Чистай благочиние эшенең 2018 елдагы нәтиҗәләре турында сөйләде.
Яуширмә һәм Кубас авыл җирлекләре башлыклары авыл җирлекләрендә милләтара һәм конфессияара мәсьәләләргә кагылышлы чаралар турында сөйләделәр, ә Чистай муниципаль районы Башкарма комитетының мәдәният бүлеге җитәкчесе Наталья Ларионова районның барлык этник төркемнәренә кагыла торган «Мәдәният мозаикасы» проектын гамәлгә ашыру турында доклад белән чыгыш ясады.